Katër alpinistë të cilët kishin mbetur të bllokuar në majën e quajtur “Çuka e Peçit” në lartësinë 2523 m, të malit të Gramozit, janë shpëtuar nga policia dhe banorët e zonës.
Alpinistët u gjetën pas disa orësh kërkime, ndërsa janë në gjendje të mirë shëndetësore.
Ata kishin mbetur të bllokuar për shkak të kushteve të vështira atmosferike.
Njoftimi i plotë i policisë:
Kolonjë
Policia në bashkëpunim me banorët e zonës, u vjen në ndihmë 4 alpinistëve.
Në Sallën Operative të Komisariatit të Policisë Kolonjë, është marrë një telefonatë sipas të cilës 4 alpinistë që kishin lënë mjetin e tyre tip “Ford”, në fshatin Starje dhe ishin nisur për të ngjitur malin e Gramozit, mund të kishin mbetur të bllokuar në rrugë për shkak të kushteve të vështira atmosferike.
Menjëherë pas marrjes së këtij njoftimi, në drejtim të zonës, u nisën shërbime të Komisariatit të Policisë Kolonjë dhe Stacionit të Policisë Kufitare Shtikë, të Emergjencave Civile, të ndihmuar edhe nga banorë të zonës.
Pas disa orë kërkimesh, u bë i mundur lokalizimi dhe gjetja në gjendje të mirë shëndetësore e 4 alpinistëve, të cilët ishin ngjitur në majën e quajtur “Çuka e Peçit” në lartësinë 2523 m, të malit të Gramozit dhe më pas për shkak të kushteve të vështira atmosferike, kishin hasur vështirësi gjatë kthimit.