Prej 16 shkurtit, opozita ka djegur mandatet e deputetëve dhe vijon protestat kundër kryeministrit Rama, të cilin e akuzon se ka ardhur në pushtet me votat e blera me paratë e krimit.
Opozita kërkon zgjedhje të parakohshme parlamentare dhe një qeveri tranzitore që do përgatisë sipas tyre zgjedhje të lira e të ndershme.
Që prej 16 shkurtit, opozita ka zhvilluar shtatë protesta kombëtare, dhe ndërkohë me 8 qershor pritet të mbahet protesta e radhës.
Kreu i Partisë Demokratike, Lulzim Basha ka refuzuar çdo lloj ftese për dialog, duke vënë si kusht të panegociueshëm largimin e kryeministrit Rama.
Por, ndërkohë që Lulzim Basha kërkon me këmbëngulje largimin e kryeministrit Rama, në qarqet mediatike përflitet se pasardhës ose nëse mund ta quajmë të tillë, “trashëgimtar” i Edi Ramës do të jetë kreu i Bashkisë së Tiranës, Erion Veliaj, apo i vetëpagëzuari me emrin Lali Eri.
E ndërkohë, që Lulzim Basha nuk i ka kursyer akuzat ndaj kryeministrit dhe eksponentëve të tjerë socialistë, që nga deputetë, ministra e kryebashkiakë, nuk sulmon asnjë herë pretendentin për “fronin” e Edi Ramës.
Për më tepër, kujtojmë këtu edhe spotin e protestës së fundit, ku Basha fliste për të ashtuquajturit “hajdutë” të Rilindjes, por në asnjë rast nuk përmendej kryebashkiaku i Tiranës Erion Veliaj.
Mos ndoshta Lali Eri qenka edhe kryeministri, që po kërkon Luli?/ CNA.al
